Është lansuar projekti i BE-së në Kosovë “Fuqizimi i mëtutjeshëm i Shërbimit Korrektues”, me të cilin synohet ngritja e sigurisë në Kosovë. Me këtë rast shefja e Zyrës së BE-së Nataliya Apostolova, tha se qendrat e paraburgimit në Kosovë përballen me sfida të ndryshme siç janë mbipopullimi, dhuna dhe radikalizmi.

Projekti, “Fuqizimi i mëtutjeshëm i Shërbimit Korrektues në Kosovë, i financuar nga Finlanda, do të ndihmojë në tejkalimin e sfidave me të cilat përballen qendrat e shërbimeve korrektuese në Kosovë.

Në lansimin e këtij projekti, shefja e Zyrës së BE-së në Kosovë, Nataliya Apostolova, tha se qendrat e paraburgimit në Evropë dhe në Kosovë përballen me sfida të ndryshme siç janë; mbipopullimi, dhuna dhe radikalizmi.

“Unë besoj shumë se ky projekt do të shërbejë si forum në shkëmbimin e përvojës dhe për transferimin e praktikave më të mira në mënyrë që t’i tejkalojmë këto sfida. Një tjetër aspekt që dua të nënvizoj është numri i të burgosurve të radikalizuar. Ky rrezik nga ata duhet të evitohet kur ata të lirohen dhe këto aspekte janë të përfshira në projekt”, tha Apostolova.

Ministri i jashtëm i Finlandës, Timo Soini, tha se objektivi i projektit është ta mbështesë Kosovën në përmirësimin e standardeve të sektorit gjyqësor,

Ministri i Drejtësisë Abelard Tahiri, duke falënderuar BE-në për mbështetjen financiare dhe profesionale në projektin e binjakëzimit, tha se reformimi i qendrave korrektuese do të jenë prioritet i qeverisjes së tij.

Projekti për fuqizimin e shërbimit korrektues në Kosovë me vlerë 2 milionë euro, do të zgjasë 30 muaj.